O COMITÉ INTEREMPRESAS RECLAMA A INCORPORACIÓN DO PERSOAL DA PROMOCIÓN INTERNA

Ante o auto do Tribunal Superior de Xustiza de Galicia, que desestima a petición de execución do acordo do 26 de febreiro respecto á convocatoria da quenda libre do proceso selectivo (ata que finalicen os trámites para acadar a autorización conxunta de Orzamentos e Función Pública), pero que non se pronuncia sobre a incorporación do persoal que obtivo praza na promoción interna, o Comité Interempresas solicitou unha xuntanza urxente, celebrada hoxe, na que reclamou a incorporación inmediata do persoal da promoción interna.

Na xuntanza de hoxe a dirección da empresa comunicou que os trámites na Xunta xa están rematados e que neste mes de xullo levará a aprobación da modificación do cadro de persoal e a convocatoria de OEP ao Consello de Administración. Con respecto á toma de posesión das prazas de promoción interna, o director de Recursos Humanos afirmou que "se produciría con efectos de primeiros de agosto".

PROPOSTA PARA UNHA REFORMA DEMOCRÁTICA DA RADIO E A TELEVISIÓN PÚBLICAS DE GALIZA

Comparecencia do presidente do Comité Interempresas da CRTVG, RG e TVG no Relatorio de reforma do marco legal da Compañía de Radio-Televisión de Galiza e as súas sociedades, no Parlamento de Galiza, o 13 de xullo de 2010.

Texto escrito

Vídeo da intervención

O COMITÉ DE EMPRESA DA TVG IRROMPE NO CONSELLO DE ADMINISTRACIÓN DA CRTVG CONTRA A EXTERNALIZACIÓN DA PRODUCIÓN

O comité de empresa da TVG e delegados sindicais dos sindicatos CIG, UXT, USO e CCOO, irromperon o pasado venres, día 9 de xullo, ás doce do mediodía, no pleno do consello de administración da CRTVG para reclamar que se poña fin á política de externalización da programación da canle autonómica, política que se ven acentuando desde o relevo da dirección xeral, ata o punto de que practicamente o cen por cen da programación non informativa do verán se vai a producir con empresas externas.

A externalización masiva da produción da TVG supón unha infrautilización dos recursos técnicos e humanos da canle pública, o que representa unha duplicidade de gastos, e pon en perigo a continuidade de moitos postos de traballo na CRTVG. A contratación indiscriminada da produción de programas da TVG constitúe unha dilapidación dos recursos públicos, en contradición coa política de aforro anunciada polo presidente do Goberno da Xunta de Galicia.

"GALEGOS NO MUMDO" PRIVATÍZASE

O pasado día 3 de xuño, ante unha pregunta do comité de TVG, que sospeitaba un cambio de rumbo na produción do programa Galegos no Mundo, a directora da TVG, Rosa Vilas, confirmou que este espazo está agora en mans dunha produtora allea, Portocabo TV.

Hai máis de 20 anos que a TVG se convertiu en pioneira en toda España coa primeira emisión de Galegos no Mundo, un programa que percorría o mundo en busca da identidade galega que se espallou máis alá das nosas fronteiras. Un espazo histórico feito por galegos e para galegos.

É lamentable que a Dirección de Televisión de Galicia se incline deste xeito a favor da externalización, pronunciándose en termos como que “somos caros”, e que “debemos apostar polos low cost”. Será obedecendo a esta premisa polo que a TVG ten agora máis da metade da súa produción en mans de produtoras alleas.

Queremos traballar. A día de hoxe, o comité de TVG, como órgano representante das traballadoras e dos traballadores desta empresa, vese na obriga de asumir este lema para frenar a xestión da Dirección da TVG, encamiñada a unha progresiva externalización da produción.

Os traballadores e traballadoras da TVG queremos seguir facendo produción propia interna, tal e como xa viñamos realizando nestes 25 anos.Somos unha canle pública autonómica, e a nosa función e a nosa obriga é precisamente desenvolver os contidos audiovisuais que demandan as galegas e galegos. Se non o facemos así, defraudamos a confianza depositada pola cidadanía nesta empresa.

A Dirección de Televisión de Galicia esqueceu que xestiona un servizo público cos cartos das galegas e galegos. O que está facendo con estes cartos é derivalos a empresas alleas, algunhas das cales buscan única e exclusivamente un beneficio económico, sin contribuir a creación dun tecido industrial do audiovisual galego.

Este Comité de empresa non pode admitir que neste momento de crise económica non se optimicen os recursos económicos, humanos e técnicos da TVG ameazando a súa sostenibilidade.

Comité de Empresa de TVG

San Marcos, 6 de Xullo de 2010